تراجعت على الدرج وجلست، وأخرجت هاتفها. _ بقى عبدالرحمن رجع... علشان كده مستقوية يا خديجة. طيب ماشي. صمتت حين تذكرت الفتاة والطفلة. _ بس مين دول؟ شكل البنت أبهة أوي. _ أيوة يا مروان، ما جتش تاخد خديجة ليه؟ مش إحنا اتفقنا إنك هتاخدها؟

جاءها صوته من الطرف الآخر باردًا، خاليًا من أي رغبة في النقاش: _ بقولك إيه، لا عايز خديجة ولا عايز غيرها... ابعدي عني وخلاص. ردت قائلة: _ خلاص، أنتَ حر... بس في حاجة أنتَ ما تعرفهاش. تجمّد صوته: _ حاجة إيه؟ ابتسمت ابتسامة خبيثة وهي تجيبه: _ حبيبها القديم رجع.

تبدلت ملامحه في اللحظة ذاتها، وجاء صوته مشدودًا: _ أنتِ بتقولي إيه؟ _ بقولك عبدالرحمن رجع... ورجع متريّش كمان. واضح إنه ناوي يرجع خديجة مهما كان الثمن، فشوف بقى هتعمل إيه علشان تمنعه. جاء صوته حادًا: _ أنتِ اتجننتي؟ أرجعها إزاي؟! أنا مطلقها! ضحكت بخفوت، ثم قالت: _ ورقة الطلاق وصلتها؟

الأكثر قراءة الان

غيث وغفرانمنذ 3 أيامطعم في يدا أليفة بقلم سيلا وليدمنذ يوميناعادت لي شبابيمنذ 4 أيام

انعقد حاجباه: _ يعني إيه؟ _ يعني أنا اللي استلمت ورقة الطلاق يا مروان. صمت، وكأن الكلمات احتاجت لحظات حتى تصل إليه. تابعت ببرود: _ الورقة اتبعتت على العنوان، وأنا اللي استلمتها. خديجة عرفت إنك طلقتها، آه... لكن ما شافتش الورقة، وما تعرفش إن الطلاق اتوثّق واتعملت إجراءاته.

_ وبعدين؟ _ وبعدين... دي فرصتك. ابتلع ريقه، بينما واصلت هي: _ لو عايزها ترجعلك، يبقى لازم تلعب صح. خديجة فاكرة إنها عارفة كل حاجة عن طلاقها. _ أعمل إيه؟ _ قول لها إنك رجعتها وأنتَ في السجــ,,ـــــن. بدأت الفكرة تتشكل في رأسه، وتعلقت أنفاسه للحظة، ثم سأل: _ وعايزاني أعمل إيه؟

جاءها صوتها أكثر خبثًا: _ خليها تفضل فاكرة كده... وبعد كده هددها بأمها تاني، واتجوزها. _ تمام... أنا برّه إسكندرية. لما أرجع... أغلقت الهاتف، ثم رفعت نظرها إلى المنزل، وصعدت إلى الأعلى مرة أخرى. _ والله لأنكّد عليكي يا بنت فاتن.

طرقت الباب مرة أخرى. فتحت خديجة، فزفرت جيهان وهي تضــ,,ـــــرب يدها بالأخرى: _ هو أنتِ ما عندكيش كرامة خالص؟ انحنت تنظر إلى مقلتيها بشماتة: _ حبيب القلب رجع يا ديجة... وراجع إيه! يخربيت جماله! الواد بقى يقول للقمر قوم وأنا أقعد مكانك.

.. يالهوي! نظرت إليها خديجة باشمئزاز: _ مش مستغربة الحقارة على فكرة. ما يرجع، أنا مالي؟ شهقت جيهان بتصنع: _ يعني مش زعلانة؟ ده أنا فكرتك مستقوية بسببه... بس يا حرام، راجع متجوز ومخلف كمان. ثم تابعت: _ إنما مراته إيه الجمال ده يا بنت يا ديجة!

شكلها من الناس الفوق أوي، ولا لبسها، ولا عيونها... الصراحة وقع واقف عبده. يعني من بعدك راح لحتة تشكوليت! _ امشي غوري في داهية تاخدك من هنا. دنت منها، ونظرت إلى عينيها، ثم همست بفحيح: _ داس عليكي من أول شهرين، وراح اتجوز أحسن منك مليون مرة، لا وخلف كمان، وبنت شكلها أتيكيت، مش بتاعة حجاب قال الله وقال الرسول.