ظلت فاتن تحدق بها، ثم همست باسم عبد الرحمن من بين شفتيها، متقطعًا: _ عبد... الرحمن... توقفت خديجة للحظة، ثم انحنت أكثر لتسمعها. _ عبد الرحمن يا ماما؟ أومأت فاتن بصعوبة. _ عبد الرحمن... يا خديجة... مسحت خديجة دموعها سريعًا، وقالت محاولة طمأنتها: _ عبد الرحمن في بيته يا ماما...
كان هنا وجابلك الدكتور، واطمن عليكي قبل ما يمشي. استيقظت حسناء على أصواتهن، ففتحت عينيها ونهضت سريعًا، واتجهت إلى الفراش. _ فاتن... حمد لله على سلامتك يا حبيبتي. رفعت فاتن عينيها إليها، ولم تقل سوى: _ عبد الرحمن... كلمي عبد الرحمن ييجي. قطبت حسناء جبينها، ثم نظرت إلى خديجة.
_ أمك عايزة عبد الرحمن؟ احتضنت خديجة كف أمها وقبلته، ثم قالت: _ حبيبتي، أنتِ حاسة بإيه؟ أجيبلك الدكتور؟ رفعت فاتن يدها بصعوبة، وكأنها تريد إسكاتها. جلست حسناء إلى جوارها، بينما توقفت خديجة عن الكلام. همست فاتن: _ حسـناء... كلـمي عبد... الرحمن.
.. اتسعت عينا حسناء، وظلت تنظر إليها غير مستوعبة. _ مامتك بتقول إيه يا حبيبتي؟ مسدت خديجة على شعر والدتها بحنان. _ حبيبتي... عايزة إيه؟ جاءها الرد ضعيفًا، لكنه واضح: _ عبد الرحمن... رفعت خديجة رأسها إلى حسناء. _ بتقول عبد الرحمن. ابتسمت حسناء رغم قلقها، وقالت بثقة: _ عبد الرحمن ابني؟
دقيقة واحدة ويكون هنا. وضعت يدها في جيب عباءتها، ثم تذكرت هاتفها. _ نسيت التليفون في البيت... اتصلي بيه يا خديجة. نظرت خديجة إلى والدتها بحيرة. _ عايزاه في إيه يا ماما؟ زمانه نزل شغله... قوليلي أنتِ عايزة إيه وأنا أبلغه.
لكن فاتن لم تجبها إلا بكلمة واحدة، وكأنها تستنجد بها: _ عبد الرحمن... يا خديجة. في تلك اللحظة، انفتح الباب. دلف خالد وخلفه جيهان. _ ماما... إيه اللي حصل؟ ثم وقعت عيناه على أخته، فانقلب القلق في وجهه إلى غضب أعمى.
_ عملتي إيه في أمك يا بت؟! انتفضت خديجة من مكانها. ـــــــــــــــــــــــــــــــــــــــــــــــــ _ معملتش حاجة يا خالد! مراتك هي اللي فهمت الموضوع غلط! تقدمت جيهان خطوة، وقالت ببرود: _ خالتي أم عبد الرحمن، ممكن ما تدخليش بينا؟ التفتت إليها حسناء بحدة. _ كده يا خالد؟ الله يكرم أصلك يا ابني.
ثم اتجهت إلى فاتن، وربتت على كتفها بحنان. _ الحمد لله اطمنت عليكي يا فاتن... هبعتلك عبد الرحمن. صاح خالد بصوت غاضب: _ وتبعتي عبد الرحمن ليه يا خالة؟ أنا موجود. ومش هعدي اللي حصل على خير، وعايز أطمن على أمي. التفتت حسناء إليه، وقد اشتعل الغضب في عينيها.
_ بقولك يا خالد، قطع لسان أي حد يتكلم على ابني كلمة. وعيب تشك في أختك وجارك من كلام مراتك! قلتلك مراتك فهمت غلط، وبعدين هنروح بعيد ليه؟ ثم أشارت إلى فاتن: _ أمك ربنا يقومها بالسلامة، اسألها بنفسك... أهي قدامك.
اقتربت منها، وانحنت عليها قائلة بصوت أكثر هدوءًا: _ اعذريني يا فاتن، بس إلا ابني. أنا مربياه على الحلال والحرام قبل ما أربيه على الأصول. وعارفة إنك تعبانة، بس لازم أعرف منك إيه اللي حصل، علشان ما أسمحش لحد يظلم ابني.
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.